CCV.

1347, December 31. Avignon.

Papst Clemens VI. bestätigt dem Kloster zwei Urkunden über das Patronatrecht in Würben.

Clemens episcopus, servus servorum dei ad perpetuam rei memoriam. Hiis, que interdum pro monasteriorum ac personarum ipsorum et eorum necessitatibus favorabiliter conceduntur, ut illa futuris perpetuis temporibus illibata consistant, libenter adicimus apostolici muniminis firmitatem. Ex serie siquidem petitionis dilectorum filiorum . . abbatis et conventus monasterii de Camentz Cisterciensis ordinis Wratislaviensis diocesis, nuper nobis exhibite percepimus, quod dudum viginti et octo anni sunt elapsi, bone memorie Henricus episcopus Wratislaviensis et quondam Johannes de Wyrbena decanus ecclesie Wratislaviensis germanus, et nonnulli alii nepotes eiusdem episcopi ius patronatus parrochialis ecclesie de villa Wyrbena prefate diocesis, ad Henricum episcopum, Johannem decanum, ac nepotes predictos iure hereditario tunc pertinens, ad hoc spiritu devotionis inducti, in abbatem et conventum dicti monasterii transtulerunt, et quod deinde prefatus Henricus episcopus de consensu dilectorum filiorum sui capituli ecclesie Wratislaviensis ac Johannis rectoris predicte ecclesie ville in Wyrbena solicite advertens, quod ipsi abbas et conventus ac monasterium multarum adversitatum et tribulationum, angustias et alia incommoda sustinuerant diucius propter guerrarum et predonum insultus in illis partibus ingruentes et quod propterea proventus ipsius monasterii adeo diminuti extiterant, quod onera eisdem abbati et conventui ac monasterio incumbentia non poterant commode supportare, idem Henricus episcopus volens predictorum abbatis et conventus ac monasterii necessitatibus huiusmodii suffragiis succurrere oportunis, certos redditus et proventus dicte parrochialis ecclesie, ut illos cedente vel decedente ipsius parrochialis ecclesie rectore, qui tunc erat, ipsi abbas et conventus eorem usibus pro dictis necessitatibus et oneribus eorum facilius supportandis applicare valerent, concessit imperpetuum et eciam applicavit, aliis certis fructibus et redditibus ipsius ecclesie in Wyrbena per ipsum Henricum episcopum pro perpetuo vicario in ipsa ecclesia domino servituro relictis, prout in diversis patentibus Henrici episcopi ac plebani seu rectoris predictorum litteris, eorum et dictorum capituli Wratislaviensis sigillis munitis, quarum tenores de verbo ad verbum presentibus inseri fecimus, plenius continetur. Quare ipsi abbas et conventus nobis humiliter supplicarunt, ut translationem, concessionem, applicationem et ordinationem predictas, ut premittitur, factas confirmare ex certa sciencia et omnem defectum, si quis in eis intervenit, supplere de benignitate apostolica dignaremur. Nos itaque huiusmodi supplicationibus inclinati, translationem, concessionem, applicationem et ordinationem prefatas, ut premittitur, factas, ratas et gratas habentes illas cum moderamine infrascripto, auctoritate apostolica ex certa sciencia confirmamus et presentis scripti patrocinio communimus, supplentes omnem defectum, si quis forsan in eis intervenerit, de apostolice plenitudine potestatis. Per hoc autem adiectionem seu clausulam in dictis litteris eiusdem Henrici episcopi contentam, in qua inter alia continetur, quod si per abbatem et fratres dicti monasterii, qui pro tempore fuerint, postquam ipsi possessionem reddituum habuerint predictorum, prenotata ipsius episcopi dispositio de eisdem observata non fuerit in premissis vel in quolibet premissorum, extunc iidem redditus et proventus omnes et singuli dicto monasterio, ut premittitur, applicati, ad ipsius episcopi et successorum suorum mensam episcopalem sine spe restitutionis integraliter devolverentur, in huiusmodi confirmatione nostra non intendimus aliquatenus comprehendi. Volumus insuper, quod si sufficiens portio pro dicto vicario perpetuo in eadem ecclesia domino servituro non fuerit assignata de ipsius ecclesie redditibus et proventibus, portio congrua per loci ordinarium assignetur, ex qua idem vicarius valeat congrue sustentari, iura episcopalia solvere et alia sibi incumbentia onera supportare. Tenor vero dictarum litterarum talis est: ­ No. CXI. - Item: - No. CXXXVII. - Nulli ergo omnino hominum etc. Si quis autem etc. Datum Avinione II. Kalendas Januarii pontificatus nostri anno sexto.

Or. Perg. Grüssau 89 im Staatsarchive. Die Bleibulle an gelbrothseidnen Fäden. Gedruckt bei Theiner, Monum. Pol. I, 509 flgd.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.